Is jy ʼn aspirant-draaiboekskrywer, maar jy weet nie waar om te begin nie? Dalk het jy reeds ʼn oorspronklike idee, maar jy sukkel om pen op papier te sit.

Skryfnet bied vanjaar ʼn splinternuwe aanlyn kursus én werkswinkel aan om jou op ʼn opwindende en praktiese wyse touwys te maak om jou kreatiwiteit aan te wakker, jou idee te ontwikkel – en dalk jou storie op die skerm te kry.

Deelnemers kan vir een óf albei van die geleenthede registreer.

Hierdie praktiese eendagwerkswinkel gaan die manier waarop jy jou draaiboeke benader vir altyd verander.

Dit word aangebied deur die veelbekroonde skrywer van lirieke, toneelstukke en draaiboeke, Johann Smith, wat ook die aanlyn kursus fasiliteer.

Die werkswinkel fokus op al die bestanddele wat nodig is om ’n uithaler-kortfilmdraaiboek te skep. Dit is die ideale werkswinkel vir aspirant-draaiboekskrywers en draaiboekskrywers wat hul vaardighede wil opskerp.